ភ្នំពេញ៖ ក្មេងទំនើងចំនួន ៣នាក់ដែលកាន់ដំបង ដាវ និងកាំបិត ស្រដៀងនឹងឧបករណ៍សម្រាប់ប្រយុទ្ធក្នុងរឿងចិន យកមកគំរាម និងបង្កការភ័យខ្លាចដល់ពលរដ្ឋក្នុងភូមិដំណាក់ធំ សង្កាត់ស្ទឹងមានជ័យទី២ ខណ្ឌមានជ័យ កាលពីយប់ថ្ងៃទី០១ ខែមករា ឆ្នាំ២០២៣ ពេលនេះសមត្ថកិច្ចបានឃាត់ខ្លួនបានហើយ។

អភិបាលខណ្ឌមានជ័យ លោក ហែម ដារិទ្ធិ បានបញ្ជាក់មកអង្គភាពសារព័ត៌មាន EAC news ថា ក្រុមក្មេងទំនើងទាំងនោះ ត្រូវបានសមត្ថកិច្ចស្រាវជ្រាវ និងឃាត់ខ្លួនបានហើយ។ លោកបញ្ជាក់ថា អាជ្ញាធរក៏បានកសាងសំណុំរឿងដើម្បីបញ្ជូនទៅតុលាការផងដែរ។

តាមវីដេអូដែលផ្សព្វផ្សាយតាមបណ្តោញសង្គមហ្វេសប៊ុក ក្រុមក្មេងទំនើងមានគ្នា ៣នាក់បានបង្ហាញនូវសកម្មភាពរត់កាន់ដំបង ដាវ និងកំាបិត ដេញសំដៅមករកក្រុមយុវជនប្រុសស្រីមួយក្រុមទៀតនៅមុខផ្ទះ ដោយវាយលើយុវតី ២នាក់ និងគំរាមចង្អុលមុខ ហើយក៏រត់ចេញពីទីនោះ៕